Óþekkt ökutæki veldur tjóni:

Sé um að ræða óþekkt ökutæki, sem valdið hefur tjóni, getur einvörðungu skapast bótaréttur hjá ABÍ vegna líkamstjóns og/eða missis framfæranda, en ekki vegna munatjóns. Sé t.d. ekið á kyrrstæða, mannlausa bifreið og tjónvaldurinn lætur sig hverfa af vettvangi, eignast eigandi kyrrstæðu bifreiðarinnar, sem ekið var á, engan rétt gagnvart ABÍ. Eigandi skemmdu bifreiðarinnar gæti þá átt kröfu á vátryggingafélag sitt, hafi hann keypt kaskótryggingu (húftryggingu), en ella yrði hann að sitja uppi með tjón sitt sjálfur.

Óvátryggt ökutæki veldur tjóni:

Sé um að ræða óvátryggt ökutæki, sem valdið hefur tjóni og reglur um aðild ABÍ teljast uppfylltar, getur tjónþoli gert kröfu á hendur ABÍ vegna bæði líkams- og munatjóns. Eftir að ABÍ hefur gert upp slík tjón er eigandi ökutækisins og ökumaður, ef hann er annar en eigandi, endurkrafinn um allan kostnað sem á ABÍ hefur fallið við uppgjör tjónsins.

Erlent ökutæki veldur tjóni:

Sé um að ræða erlent ökutæki (frá ríkjum innan EES), sem valdið hefur tjóni, getur tjónþoli gert kröfu á hendur ABÍ á sama hátt og hann hefði gert á íslenska vátryggjandann, hefði tjónvaldur ekið íslensku ökutæki. Rétt er að benda á að upplýsingar um skráningarnúmer og skráningarland erlenda ökutækisins eru mjög mikilvægar til að auðvelda og flýta aðkomu ABÍ að uppgjöri.

Leiðbeiningar til tjónþola:

Til að auðvelda og flýta fyrir aðkomu og uppgjöri ABÍ að tjónum sem valdið er af óvátryggðum og erlendum ökutækjum þurfa tjónþolar, sem hyggjast beina bótakröfum á hendur ABÍ, að sjá til að berist eða koma til ABÍ sem fyrst, lögregluskýrslu og eða tjónstilkynningu ásamt tjónsskoðunarskýrslu þar sem tjónið hefur verið metið á verkstæði sem tjónþoli hyggst láta gera við ökutæki sitt.

Meðferð ágreiningsmála:

Ágreiningur getur risið milli annars vegar vátryggingafélaga og hins vegar þeirra, sem telja sig eiga rétt til vátryggingarbóta. Ætíð er unnt að skjóta slíkum ágreiningi til almennra dómstóla. Sú leið er þó iðulega bæði tímafrek og kostnaðarsöm, og af þeim ástæðum oft ekki fýsileg fyrir neytendur.